Marrocos ingresa na Unión Africana
Este luns 30 de Xaneiro a Unión Africana aceptou a solicitude de ingreso de Marrocos, ata agora único país Africano fóra deste organismo. Trátase dunha noticia de gran relevancia respecto da cuestión do Sahara Occidental.
É especialmente relevante especificar que a admisión de Marrocos á Unión Africana non se trata dun reingreso tal e como anuncian múltiples medios de información, xa que Marrocos nunca formou parte deste organismo, se non da anterior OUA (Organización para a Unidade Africana), que abandonou en 1984 ao negarse a admitir á RASD (República Árabe Saharauí Democrática) na mesma. No 2002 este organismo desaparece para deixar paso á UA, á que Marrocos nunca ingresou ata esta semana, mentres a RASD formou parte da súa fundación.
A relevancia deste dato que ignoran os medios é clave no conflito do Sahara Occidental e a súa ocupación ilegal, xa que imposibilita a expulsión da RASD deste organismo e teoricamente obriga a Marrocos a aceptar a súa soberanía. Tal e como explica Carlos Ruiz Miguel, catedrático de Dereito Constitucional da USC e e director do Centro de Estudos sobre o Sahara Occidental (CESO) da Universidade de Santiago de Compostela: ”
“En primeiro lugar, guste ou non, a entrada de Marrocos na UA é un acto de recoñecemento da República Saharauí. Convén non esquecer que un dos obxectivos da Unión Africana (art. 3 da súa Acta constitutiva) é
- Defender a soberanía, a integridade territorial e a independencia dos seus Estados membros
Por tanto, Marrocos intégrase nunha organización que busca defender a soberanía, a integridade territorial e a independencia da República Saharauí.”
Queda estar atentos aos movementos do Majden dentro da Unión Africana, e a presión que exercerá a Fronte Polisario nesta nova situación, xa que ata agora non compartiran representación nun organismo desta relevancia internacional.
Comentarios recentes